Gələcəyin şəhərlərini quraraq: ICA Group Ümumdünya Şəhərsalma Forumunda
Azərbaycanda keçirilən mühüm sərgi tədbirlərinin həmtəşkilatçısı olan “ICA Group” Ümumdünya Şəhərsalma Forumu (WUF13) çərçivəsində vahid korporativ stendlə təmsil olunacaq. Dayanıqlı inkişaf, yaşıl texnologiyaların dəstəklənməsi və müasir şəhər mühitinin formalaşdırılmasına yönəlmiş yanaşmaların təşviqi “ICA Group”-un fəaliyyətinin istiqamətlərindən biridir.
WUF13 çərçivəsində şirkət Azərbaycan, Qazaxıstan, Polşa, Özbəkistan və Türkiyə ərazisində həyata keçirilən əsas beynəlxalq tikinti və infrastruktur sərgi layihələrini təqdim edəcək. Qrup tərəfindən təşkil olunan tədbirlər müasir tikinti texnologiyalarının, innovativ mühəndis həllərinin, dayanıqlı şəhərsalma yanaşmalarının və aktual infrastruktur layihələrinin nümayiş etdirildiyi peşəkar biznes platformalarıdır. Bu tədbirlər dövlət qurumlarını, sahə üzrə ekspertləri, investorları və özəl sektor nümayəndələrini təcrübə mübadiləsi, yeni həllərin axtarışı və peşəkar əməkdaşlığın inkişafı məqsədilə bir araya gətirir.
İştirak çərçivəsində əsas diqqət 14–16 oktyabr tarixlərində Bakı Ekspo Mərkəzində altıncı dəfə keçiriləcək “Rebuild Karabakh” – Azərbaycan Beynəlxalq Qarabağın Bərpa, Yenidənqurma və İnkişafı Sərgisinə yönəldiləcək.
“Rebuild Karabakh” sərgisi bu gün qlobal gündəmdə xüsusi aktuallıq kəsb edən mövzulardan biri olan ərazilərin dayanıqlı bərpasını, müasir infrastrukturun inkişafını, təhlükəsiz və komfortlu şəhər mühitinin formalaşdırılmasını, eləcə də gələcəyin icmalarının yaradılmasını əks etdirir. WUF13 forumunun mövzu kontekstində “Rebuild Karabakh” sərgisi postmünaqişə dövründə bərpa və dayanıqlı inkişaf sahəsində beynəlxalq əməkdaşlığın əyani nümunələrindən biri kimi çıxış edir.
Beynəlxalq sərgilər onilliklər boyu şəhərlərin inkişafı və transformasiyasında mühüm rol oynayaraq, bir çox hallarda infrastruktur dəyişikliklərinin və uzunmüddətli şəhər inkişafının katalizatoruna çevrilmişdir. Tarixdə sərgi tədbirlərinin şəhərlərə mühüm irs qoyduğu çoxsaylı nümunələr mövcuddur — 1889-cu il Ümumdünya Sərgisi üçün inşa edilmiş Parisdəki Eyfel qülləsindən tutmuş, bu gün də şəhərlərə xidmət edən sərgi kompleksləri, konqres mərkəzləri, nəqliyyat infrastrukturu və yeni biznes rayonlarınadək. Müasir ixtisaslaşmış sərgilər də investisiyaların cəlb olunmasına, biznes mühitinin inkişafına, peşəkar təcrübə mübadiləsinə və gələcəyin şəhərlərinin formalaşmasına təsir göstərən innovasiyaların təşviqinə mühüm töhfə verir.
“ICA Group”-un “Iteca Caspian” və “Caspian Event Organisers” kimi yerli tərəfdaşlarla yanaşı WUF13 forumunda iştirakı tərəfdaşlıq əlaqələrinin genişləndirilməsi və müasir şəhərlərin, eləcə də dayanıqlı şəhər mühitinin inkişafına töhfə verən layihələrin qlobal auditoriyaya təqdim olunması baxımından mühüm addım olacaq.
BMT-nin Məskunlaşma Proqramı (UN-Habitat) tərəfindən təşkil olunan Ümumdünya Şəhərsalma Forumu (World Urban Forum – WUF) şəhərlərin dayanıqlı inkişafı, urbanizasiya, infrastruktur, innovativ şəhər həlləri və gələcəyin şəhərlərinin formalaşdırılması məsələlərinin müzakirə olunduğu ən nüfuzlu beynəlxalq platformalardan biridir.
Sizi 17–22 may tarixlərində keçiriləcək WUF13 çərçivəsində “ICA Group”-un D08 nömrəli stendini ziyarət etməyə və tikinti, infrastruktur, dayanıqlı şəhərlər və gələcəyin şəhər icmalarının inkişafına yönəlmiş beynəlxalq layihələrlə tanış olmağa dəvət edirik.